Konfiskimi i Pasurisë në Kosovë: Veprimi Kundrejt Performimit

Organizata Çohu!, ka prezantuar hulumtimin lidhur me konfiskimin e pasurisë së përfituar në mënyre të paligjshme në Kosovë, si një ndër sfidat kryesore për të luftuar dhe parandaluar krimin e organizuar. Hulumtimi është titulluar "Veprimi Kundrejt Performimit". 

Në konferencë të pranishëm kanë qenë përfaqësues nga Kuvendi i Republikës së Kosovës, Gjykata Supreme e Kosovës, Ministria e Drejtësisë/ Agjencia për Administrimin e Pasurisë së Sekuestruar ose të Konfiskuar. Pas hapjes së tryezës dhe fjalës hyrëse, z. Arton Demhasaj bëri prezantimin e studimit/analizës.

Sipas z. Demhasaj, hulumtimi është ndërtuar mbi bazën e interpretimit të të dhënave mbi konfiskimin  pasurisë, mbi praktikat më të mira rajonale dhe ndërkombëtare si dhe mbi analizën e përmbajtjes së legjislacionit aktual që e rregullon ketë fushë. Tutje z. Demhasaj, përmbledhi të gjeturat kryesore në mungesën e zbatimit të legjislacionit aktual (për 3 vjet me radhë, asnjë rast nuk është zbatuar bazuar në Ligjin për Kompetencat e Zgjeruara), nevojën për bazë të re ligjore e cila do të merrej me ndjekjen e pasurisë së fituar në mënyrë të paligjshme, mungesën e bashkëpunimit ndër-institucional, problemet në definimin dhe përdorimin e termeve: ngrirja, sekuestrimi dhe konfiskimi në mënyrë të unifikuar në të gjitha aktet ligjore të cilat merren me këtë fushë dhe të gjeturat tjera nga hulumtimi. 

Pas prezantimit të të gjeturave dhe rekomandimeve nga studimi, panelistët në konferencë: Albulena Haxhiu – Komisioni për Legjislacion, Avdi Dinaj nga Gjykata Supreme e Kosovës si dhe Fadil Bunjaku nga Agjencia për Administrimin e Pasurisë së Sekuestruar apo të Konfiskuar, u pajtuan më të gjeturat e studimit dhe me nevojën e një baze të re dhe të unifikuar ligjore e cila do të merrej ekskluzivisht me konfiskimin e pasurisë së paligjshme në Kosovë. 

Në anën tjetër, përfaqësues nga shoqëria civile si Betim Musliu dhe Ehat Miftaraj nga IKD si dhe Visar Sutaj nga KDI shprehën shqetësimet e tyre lidhur me kalimin e konfiskimit në procedurë civile duke u bazuar në kapjen e sistemit të drejtësisë nga politika. Po ashtu këta përfaqësues të shoqërisë civile fokus të veçantë i kushtuan mungesës së vullnetit politik, më shumë mungesës së zbatimit të legjislacionit ekzistues sesa nevojës për një pako të re ligjore si dhe probleme të tjera me konfiskimin e pasurisë. 

Tutje hulumtimi gjen probleme të mëdha statistikore, dallime të mëdha në mes shumës së sekuestrimit krahasuar me atë të konfiskimit përfundimtar, raste nga prokuroritë dhe gjykatat lidhur me sekuestrimin dhe konfiskimin si dhe probleme të tjera.

Në fund, bazuar në të gjeturat e hulumtimit dhe diskutimet në tryezë, si përfundime të tryezës dolën mungesa e vullnetit për zbatimin e ligjeve ekzistuese, mungesa e efikasitetit të institucioneve relevante, në veçanti Prokurorisë së Shtetit, mungesa e koordinimit dhe bashkëpunimit në mes të institucioneve kryesore relevante për konfiskimin e pasurisë si dhe problemi me legjislacionin ekzistues i cili rregullon konfiskimin e pasurisë.

Lista e dokumenteve Confiscation of property in Kosovo Konfiskimi i pasurisë në Kosovë