-
HulumtimePandemi në Gjyqësi
-
20 Nëntor '20
-
Autor: Rina Koliqi dhe Genc Nimoni
-
-
HulumtimeKeqpërdorimi në prokurim publik
-
23 Prill '20
-
Autor: Rina Koliqi
-
-
HulumtimeQasja në drejtësi
-
18 Nëntor '19
-
Autor: Genc Nimoni dhe Rina Koliqi
-
Zbulimi i një arsenali armatimi me sasi të mjaftueshme për një luftë në Drenas dëshmon qartë lidhjet e qeverisë aktuale me krimin e organizuar dhe korrupsionin politik. Në këtë rast janë burgosur si të implikuar dy zyrtarë të lartë të AAK-së, njëri prej tyre kryetar i degës për Drenas dhe këshilltar politik i ministrit Ibrahim Selmanaj.
Arsyetimi i qeveritarëve, veçanërisht aryetimet tashmë tipike të kryeministrit Çeku në stilin “këto janë insinuata”, por edhe reagimin qesharak të ministrit Selmanaj se “të implikuarit nuk ishin në orar të punës” (sic. si mund të bartet një arsenal i tillë në vendin e punës), në asnjë mënyrë nuk mund të largojnë përgjegjësinë nga ta, qeveria dhe nga partia që i takojnë.
Organizata ÇOHU qysh nga themelimi i saj ka paralajmëruar si dhe ka sjellë dëshmi në vazhdimësi për lidhjet e politikës me krimin e organizuar si dhe veprimet korruptive të liderëve institucional dhe partiak. BE-ja në një raport të vetin në nëntor ka thënë se krimi i organizuar është futur në politikën kosovare. Indikator i fuqishëm që dëshmon përfshirjen e politikanëve kosovarë në aktivitete jashtaligjore është luksi alla “COZA NOSTRA” në kushte të një varfërie të përgjithshme në Kosovë. Indikator se politikanët kosovarë janë mbi ligjin, është fakti se deri më sot ndaj asnjërit prej tyre nuk janë inicuar procedura hetimore as për korrupsion e as për involvimin e tyre në krim megjithë dëshmitë e bollshme të sjellura. Në këto rrethana është krijuar një ambient komod për lulëzimin e krimit të organizuar dhe korrupsionit, ku ligjin e vendosin simbas dëshirës njerëzit omnipotent në politikë .
Në një situatë të tillë të një mungese totale të dhënies llogari, gjetja e një arsenali të tillë armësh duhet të shënojë kulmin e alarmit për shoqërinë kosovare. Kjo kërcënon sigurinë e secilit dhe sigurinë e Kosovës në përgjithësi.
Në një situatë të tillë, në një moment kaq delikat për Kosovën, krijohet përshtypja se me qytetarin kosovar është duke u luajtur një lloj ruleti rus. Kur politika është e zhytur në korrupsion dhe krim të organizuar, gjithkush mund të ketë ndikim mbi ta përveç qytetarëve. Një pjese të konsiderueshme të politikës kosovare sot, interesi individual dhe klanor iu ka hipur mbi çfarëdo parimi a vlere morale. Pra, politika kosovare sot blehet lehtë. Ky fakt, bën praninë e sasive të mëdha të armatimit shumë të rrezikshme dhe me potencial fatal për shoqërinë kosovare.
Në një moment të tillë, secili kosovar do duhej të reflektonte. Secili njeri që nuk është i verbuar ose i shantazhuar nga pasuria e paligjshme duhet të ndërmarrë një hap për ta kthyer Kosovën në ligjshmëri. Kuvendi i Kosovës, shoqëria civile, media kosovare dhe secili qytetar i Kosovës duhet të fillojnë të pyesin se çfarë shoqërie duam të ndërtojmë. A dëshirojmë një vend të sunduar nga krimi i organizuar apo duam të vendosim një demokraci të kristalizuar të bazuar në sundim të ligjit, ku njerëzit e zgjedhur në zyra publike japin llogari për atë që e bëjnë dhe që s’e bëjnë.
Nuk është kjo më vërejtja e fundit para hendekut që po na pret. Kjo është këmbana e fundit e alarmit për një moment fatal në të cilin Kosova tashmë mund të ketë shkelur.